uēspĕr ădēst iŭuĕnēs. cōnsūrgĭtĕ. Vēspĕr Ŏlŷmpō
ēxspēctātă dĭū uīx tāndēm lūmĭnă tōllĭt.
sūrgĕrĕ iām tēmpūs. iām pīnguēs līnquĕrĕ mēnsās.
iām uĕnĭēt uīrgō. iām dīcētūr Hÿmĕnaēŭs.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
cērnĭtĭs īnnūptaē iŭuĕnēs. cōnsūrgĭtĕ cōntrā.
nīmīrum Oētaēōs ōstēndīt Nōctĭfĕr īgnēs.
sīc cērtē est. uĭdĕn ūt pērnīcĭtĕr ēxsīluērŭnt.
nōn tĕmĕre ēxsīluērĕ. cănēnt quōd uīsĕrĕ pār ĕst.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
nōn făcĭlīs nōbīs aēquālēs pālmă părātă est.
āspĭcĭte īnnūptaē sēcum ūt mĕdĭtātă rĕquīrŭnt.
nōn frūstrā mĕdĭtāntŭr. hăbēnt mĕmŏrābĭlĕ quōd sĭt.
nēc mīrūm. pĕnĭtūs quaē tōtā mēntĕ lăbōrănt.
nōs ălĭō mēntēs ălĭō dīuīsĭmŭs aūrēs.
iūre ĭgĭtūr uīncēmŭr. ămāt uīctōrĭă cūrăm.
quārē nūnc ănĭmōs sāltēm cōmmīttĭtĕ uēstrōs.
dīcĕrĕ iam īncĭpĭēnt. iām rēspōndērĕ dĕcēbĭt.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
Hēspĕrĕ. quī caēlō fērtūr crūdēlĭŏr īgnĭs.
quī nātām pōssīs cōmplēxu āuēllĕrĕ mātrĭs.
cōmplēxū mātrīs rĕtĭnēntem āuēllĕrĕ nātăm.
ēt iŭuĕni ārdēntī cāstām dōnārĕ pŭēllăm.
quīd făcĭūnt hōstēs cāptā crūdēlĭŭs ūrbĕ.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
Hēspĕrĕ. quī caēlō lūcēt iūcūndĭŏr īgnĭs.
quī dēspōnsă tŭā fīrmēs cōnūbĭă flāmmā
quaē pĕpĭgērĕ uĭrī pĕpĭgērūnt āntĕ părēntēs
nēc iūnxērĕ prĭūs quām sē tŭŭs ēxtŭlĭt ārdŏr.
quīd dătŭr ā dīuīs fĕlĭcī ōptātĭŭs hōrā.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
Hēspĕrŭs ē nōbīs aēquālēs ābstŭlĭt ūnăm.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
...
nāmquĕ tŭo āduēntū uĭgĭlāt cūstōdĭă sēmpĕr.
nōctĕ lătēnt fūrēs quōs īdēm saēpĕ rĕuērtēns
Hēspĕrĕ mūtātō cōmprēndīs nōmĭne Ĕōō.
āt lŭbĕt īnnūptīs fīctō tē cārpĕrĕ quēstū.
quīd tūm sī cārpūnt tăcĭtā quēm mēntĕ rĕquīrŭnt.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
ūt flōs īn saēptīs sēcrētūs nāscĭtŭr hōrtīs.
īgnōtūs pĕcŏrī. nūllō cōntūsŭs ărātrō.
quēm mūlcēnt aūraē. fīrmāt Sōl. ēdŭcăt īmbĕr.
mūlti īllūm pŭĕrī mūltae ōptāuērĕ pŭēllaē.
īdēm cūm tēnuī cārptūs dēflōrŭĭt ūnguī
nūlli īllūm pŭĕrī nūllae ōptāuērĕ pŭēllaē.
sīc uīrgō dum īntāctă mănēt dūm cāră sŭīs ĕst.
cūm cāstum āmīsīt pōllūtō cōrpŏrĕ flōrĕm
nēc pŭĕrīs iūcūndă mănēt nēc cāră pŭēllīs.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.
ūt uĭdŭa īn nūdō uītīs quaē nāscĭtŭr āruō
nūmquām se ēxtōllīt. nūmquām mītem ēdŭcăt ūuăm.
sēd tĕnĕrūm prōnō dēflēctēns pōndĕrĕ cōrpŭs
iām iām cōntīngīt sūmmūm rādīcĕ flăgēllŭm.
hānc nūlli āgrĭcŏlaē nūllī cŏlŭērĕ iŭuēncī.
āt sī fōrte ĕădēm est ūlmō cōniūnctă mărītō
mūlti īllam āgrĭcŏlaē mūltī cŏlŭērĕ iŭuēncī.
sīc uīrgō dum īntāctă mănēt dum īncūltă sĕnēscĭt.
cūm pār cōnūbiūm mātūrō tēmpŏre ădēptă est
cāră uĭrō măgĭs ēt mĭnŭs ēst īnuīsă părēntī.
ēt tū nē pūgnā cūm tālī cōniŭgĕ uīrgō.
nōn aēquūm est pūgnārĕ pătēr cuī trādĭdĭt īpsĕ.
īpsĕ pătēr cūm mātrĕ quĭbūs pārērĕ nĕcēssĕ est.
uīrgĭnĭtās nōn tōtă tŭā. est ēx pārtĕ părēntŭm est.
tērtĭă pārs pātrī est. pārs ēst dătă tērtĭă mātrī.
tērtĭă sōlă tŭā est. nōlī pūgnārĕ dŭōbŭs
quī gĕnĕrō suō iūră sĭmūl cūm dōtĕ dĕdērŭnt.
Hŷmēn ō Hÿmĕnaēĕ. Hÿmēn ădĕs ō Hÿmĕnaēĕ.

Vesper adest, iuvenes, consurgite: Vesper Olympo
exspectata diu vix tandem lumina tollit.
surgere iam tempus, iam pinguis linquere mensas,
iam veniet virgo, iam dicetur hymenaeus.
Hymen o Hymenaee, Hymen ades o Hymenaee!
Cernitis, innuptae, iuvenes? consurgite contra;
nimirum Oetaeos ostendit Noctifer ignes.
sic certest; viden ut perniciter exsiluere?
non temere exsiluere, canent quod vincere par est.
Hymen o Hymenaee, Hymen ades o Hymenaee!

non facilis nobis, aequales, palma parata est:
aspicite, innuptae secum ut meditata requirunt.
non frustra meditantur: habent memorabile quod sit;
nec mirum, penitus quae tota mente laborant.
nos alio mentes, alio divisimus aures;
iure igitur vincemur: amat victoria curam.
quare nunc animos saltem convertite vestros;
dicere iam incipient, iam respondere decebit.
Hymen o Hymenaee, Hymen ades o Hymenaee!

Hespere, quis caelo fertur crudelior ignis?
qui natam possis complexu avellere matris,
complexu matris retinentem avellere natam,
et iuueni ardenti castam donare puellam.
quid faciunt hostes capta crudelius urbe?
Hymen o Hymenaee, Hymen ades o Hymenaee!

Hespere, quis caelo lucet iucundior ignis?
qui desponsa tua firmes conubia flamma,
quae pepigere uiri, pepigerunt ante parentes,
nec iunxere prius quam se tuus extulit ardor.
quid datur a diuis felici optatius hora?
Hymen o Hymenaee, Hymen ades o Hymenaee!

Hesperus e nobis, aequales, abstulit unam.
. . . . . . . . .

. . . . . . . . . . .
namque tuo adventu vigilat custodia semper,
nocte latent fures, quos idem saepe revertens,
Hespere, mutato comprendis nomine Eous
at lubet innuptis ficto te carpere questu.
quid tum, si carpunt, tacita quem mente requirunt?
Hymen o Hymenaee, Hymen ades o Hymenaee!

Vt flos in saeptis secretus nascitur hortis,
ignotus pecori, nullo convolsus aratro,
quem mulcent aurae, firmat sol, educat imber;
multi illum pueri, multae optavere puellae:
idem cum tenui carptus defloruit ungui,
nulli illum pueri, nullae optavere puellae:
sic virgo, dum intacta manet, dum cara suis est;
cum castum amisit polluto corpore florem,
nec pueris iucunda manet, nec cara puellis.
Hymen o Hymenaee, Hymen ades o Hymenaee!

Ut vidua in nudo vitis quae nascitur aruo,
numquam se extollit, numquam mitem educat vuam,
sed tenerum prono deflectens pondere corpus
iam iam contingit summum radice flagellum;
hanc nulli agricolae, nulli coluere iuvenci:
at si forte eadem est ulmo coniuncta marito,
multi illam agricolae, multi coluere iuvenci:
sic virgo dum intacta manet, dum inculta senescit;
cum par conubium maturo tempore adepta est,
cara viro magis et minus est invisa parenti.
Hymen o Hymenaee, Hymen ades o Hymenaee!

Et tu ne pugna cum tali coniuge virgo.
non aequom est pugnare, pater cui tradidit ipse,
ipse pater cum matre, quibus parere necesse est.
virginitas non tota tua est, ex parte parentum est,
tertia pars patrest, pars est data tertia matri,
tertia sola tua est: noli pugnare duobus,
qui genero suo iura simul cum dote dederunt.
Hymen o Hymenaee, Hymen ades o Hymenaee!