phăsēlŭs īllĕ quēm uĭdētĭs hōspĭtēs
ăīt fŭīssĕ nāuĭūm cĕlērrĭmŭs.
nĕque ūllĭūs nătāntĭs īmpĕtūm trăbĭs
nĕquīssĕ praētĕrīrĕ. sīuĕ pālmŭlīs
ŏpūs fŏrēt uŏlārĕ. sīuĕ līntĕō.
ĕt hōc nĕgāt mĭnācĭs Ādrĭātĭcī
nĕgārĕ lītŭs īnsŭlāsuĕ Cŷclădēs
Rhŏdūmquĕ nōbĭlem hōrrĭdāmquĕ Thrācĭăm
Prŏpōntĭdēm trŭcēmuĕ Pōntĭcūm sĭnŭm
ŭbi īstĕ pōst phăsēlŭs āntĕā fŭĭt
cŏmātă sīluă. nām Cÿtōrĭo īn iŭgō
lŏquēntĕ saēpĕ sībĭlum ēdĭdīt cŏmā.
Ămāstrĭs Pōntĭca. ēt Cÿtōrĕ būxĭfĕr.
tĭbi haēc fŭīsse ĕt ēssĕ cōgnĭtīssĭmă
ăīt phăsēlŭs. ūltĭma ēx ŏrīgĭnĕ
tŭō stĕtīssĕ dīcĭt īn căcūmĭnĕ.
tŭo īmbŭīssĕ pālmŭlās ĭn aēquŏrĕ.
ĕt īndĕ tōt pĕr īmpŏtēntĭā frĕtă
ĕrūm tŭlīssĕ. laēuă sīuĕ dēxtĕră
uŏcārĕt aūră sīue. ŭtrūmquĕ Iūppĭtĕr
sĭmūl sĕcūndŭs īncĭdīssĕt īn pĕdĕm.
nĕque ūllă uōtă lītŏrālĭbūs dĕīs
sĭbi ēssĕ fāctă cūm uĕnīrĕt ā mărī
nŏuīssĭmo hūnc ăd ūsquĕ līmpĭdūm lăcŭm.
sĕd haēc prĭūs fŭērĕ. nūnc rĕcōndĭtă
sĕnēt quĭētĕ. sēquĕ dēdĭcāt tĭbĭ
gĕmēllĕ Cāstŏr ēt gĕmēllĕ Cāstŏrīs.

Phaselus ille, quem videtis, hospites,
ait fuisse navium celerrimus,
neque ullius natantis impetum trabis
nequisse praeterire, sive palmulis
opus foret volare sive linteo.
Et hoc negat minacis hadriatici
negare litus insulasve Cycladas
Rhodumque nobilem horridamque Thraciam
Propontida trucemve Ponticum sinum,
ubi iste post phaselus antea fuit
comata silva; nam Cytorio in iugo
loquente saepe sibilum edidit coma.
Amastri Pontica et Cytore buxifer,
tibi haec fuisse et esse cognitissima
ait phaselus, ultima ex origine
tuo stetisse dicit in cacumine,
tuo imbuisse palmulas in aequore,
et inde tot per impotentia freta
erum tulisse, laeva sive dextera
vocaret aura, sive utrumque Iuppiter
simul secundus incidisset in pedem;
neque ulla vota litoralibus deis
sibi esse facta, cum veniret a mari
novissimo hunc ad usque limpidum lacum.
Sed haec prius fuere; nunc recondita
senet quiete seque dedicat tibi,
gemelle Castor et gemelle Castoris.