sălāx tăbērnă. uōsquĕ cōntŭbērnālēs.
ă pīllĕātīs nōnă frātrĭbūs pīlă.
sŏlīs pŭtātĭs ēssĕ mēntŭlās uōbīs.
sŏlīs lĭcērĕ quīdquĭd ēst pŭēllārŭm
cōnfūtuĕre. ēt pŭtārĕ cētĕrōs hīrcōs.
ān cōntĭnēntēr quōd sĕdētĭs īnsūlsī
cēntum ān dŭcēntī nōn pŭtātĭs aūsūrŭm
me ūnā dŭcēntōs īrrŭmārĕ sēssōrēs.
ātquī pŭtātĕ. nāmquĕ tōtĭūs uōbīs
frōntēm tăbērnaē sōrpĭōnĭbūs scrībăm.
pŭēllă nām mī quaē mĕō sĭnū fūgĭt.
ămātă tāntūm quāntum ămābĭtūr nūllă.
prō quā mĭhī sūnt māgnă bēllă pūgnātă.
cōnsēdĭt īstīc. hānc bŏnī bĕātīquĕ
ōmnēs ămātĭs. ēt quĭdēm quŏd īndīgnŭm est
ōmnēs pŭsīlli ēt sēmĭtārĭī moēchī.
tū praētĕr ōmnēs ūnĕ dē căpīllātīs
cŭnīcŭlōsaē Cēltĭbērĭaē. fīlī
Ĕgnāti. ŏpācă quēm bŏnūm făcīt bārbă.
ēt dēns Hĭbērā dēfrĭcātŭs ūrīnā.

Salax taberna vosque contubernales,
a pilleatis nona fratribus pila,
solis putatis esse mentulas vobis,
solis licere, quidquid est puellarum,
confutuere et putare ceteros hircos?
an, continenter quod sedetis insulsi
centum an ducenti, non putatis ausurum
me una ducentos irrumare sessores?
atqui putate: namque totius vobis
frontem tabernae sopionibus scribam.
puella nam mi, quae meo sinu fugit,
amata tantum quantum amabitur nulla,
pro qua mihi sunt magna bella pugnata,
consedit istic. hanc boni beatique
omnes amatis, et quidem, quod indignum est,
omnes pusilli et semitarii moechi;
tu praeter omnes une de capillatis,
cuniculosae Celtiberiae fili,
Egnati. opaca quem bonum facit barba
et dens Hibera defricatus urina.