lūgēte ō Vĕnĕrēs Cŭpīdĭnēsquĕ
ēt quāntūm est hŏmĭnūm uĕnūstĭōrŭm.
pāssēr mōrtŭŭs ēst mĕaē pŭēllaē.
pāssēr dēlĭcĭaē mĕaē pŭēllaē.
quēm plūs īlla ŏcŭlīs sŭīs ămābăt.
nām mēllītŭs ĕrāt sŭāmquĕ nōrăt
īpsām tām bĕnĕ quām pŭēllă mātrĕm.
nēc sēse ā grĕmĭo īllĭūs mŏuēbăt
sēd cīrcūmsĭlĭēns mŏdo hūc mŏdo īllūc
ād sōlām dŏmĭnam ūsquĕ pīpĭlābăt.
quī tūnc īt pĕr ĭtēr tĕnēbrĭcōsŭm
īllūc ūndĕ nĕgānt rĕdīrĕ quēmquăm.
āt uōbīs mălĕ sīt mălaē tĕnēbraē
Ōrcī. quae ōmnĭă bēllă dēuŏrātĭs.
tām bēllūm mĭhĭ pāssĕrem ābstŭlīstĭs.
ō fāctūm mălĕ. ō mĭsēllĕ pāssĕr.
tŭā nūnc ŏpĕrā mĕaē pŭēllaē
flēndō tūrgĭdŭlī rŭbēnt ŏcēllī.

Lugete, o Veneres Cupidinesque,
et quantum est hominum venustiorum:
passer mortuus est meae puellae,
passer, deliciae meae puellae,
quem plus illa oculis suis amabat.
nam mellitus erat suamque norat
ipsam tam bene quam puella matrem,
nec sese a gremio illius movebat,
sed circumsiliens modo huc modo illuc
ad solam dominam usque pipiabat.
qui nunc it per iter tenebricosum
illuc, unde negant redire quemquam.
at vobis male sit, malae tenebrae
Orci, quae omnia bella devoratis:
tam bellum mihi passerem abstulistis
o factum male! o miselle passer!
tua nunc opera meae puellae
flendo turgiduli rubent ocelli.