quĭs hōc pŏtēst uĭdērĕ. quīs pŏtēst pătī.
nĭsi īmpŭdīcŭs ēt uŏrāx ĕt ālĕō.
Māmūrram hăbērĕ quōd Cŏmātă Gāllĭă
hăbēbăt ūncti ĕt ūltĭmā Brĭtānnĭă.
cĭnaēdĕ Rōmŭle. haēc uĭdēbĭs. ēt fĕrēs.
ĕt īllĕ nūnc sŭpērbŭs ēt sŭpērflŭĕns
pĕrāmbŭlābĭt ōmnĭūm cŭbīlĭă
ŭt ālbŭlūs cŏlūmbŭs aūt Ădōnĕŭs.
cĭnaēdĕ Rōmŭle. haēc uĭdēbĭs. ēt fĕrēs.
ĕs īmpŭdīcŭs ēt uŏrāx ĕt ālĕō.
ĕōnĕ nōmĭne īmpĕrātŏr ūnĭcĕ
fŭīsti ĭn ūltĭma ōccĭdēntĭs īnsŭlā
ŭt īstă uōstră dīffŭtūtă mēntŭlă
dŭcēntĭēs cŏmēssĕt aūt trĕcēntĭēs.
quĭd ēst ălīd. sĭnīstră lībĕrālĭtăs.
părum ēxpătrāuĭt. ān părum ēllŭātŭs ĕst.
pătērnă prīmă lāncĭnātă sūnt bŏnă.
sĕcūndă praēdă pōntĭca. īndĕ tērtĭă
Hĭbēră quām scĭt āmnĭs aūrĭfēr Tăgŭs.
nūnc Gāllĭaē tĭmētŭr ēt Brĭtānnĭaē.
quĭd hūnc mălūm fŏuētĭs. aūt quĭd hīc pŏtĕst.
nĭsi ūnctă dēuŏrārĕ pātrĭmōnĭă.
ĕōnĕ nōmĭne ūrbĭs ō pĭīssĭmĕ
sŏcēr gĕnērquĕ pērdĭdīstĭs ōmnĭă.

Quis hoc potest videre, quis potest pati,
nisi impudicus et vorax et aleo,
Mamurram habere quod Comata Gallia
habebat uncti et ultima Britannia?
cinaede Romule haec videbis et feres?
et ille nunc superbus et superfluens
perambulabit omnium cubilia,
ut albulus columbus aut Adoneus?
cinaede Romule, haec videbis et feres?
es impudicus et vorax et aleo.
eone nomine, imperator unice,
fuisti in ultima occidentis insula,
ut ista vestra diffututa mentula
ducenties comesset aut trecenties?
quid est alid sinistra liberalitas?
parum expatrauit an parum elluatus est?
paterna prima lancinata sunt bona,
secunda praeda Pontica, inde tertia
Hibera, quam scit amnis aurifer Tagus:
nunc Galliae timetur et Britanniae.
quid hunc malum fouetis? aut quid hic potest
nisi uncta devorare patrimonia?
eone nomine urbis opulentissime
socer generque, perdidistis omnia?